Trampels Wahlkampf

Hilaari Baabe: «Jäää – ebe jooo – jo ebe – wa i merk ond gsie bim Trampel isch halt ebe-n-ase graad wider gliich wie allewile, ebe met dem ewige ase, ond allewile-n-ase, ond nünt as ase, chönnt-me's halt ebe-n-ase im Groossne suuber ond glatt nüd bruuche, wenn's ebe-n-allewile gad ase gäng, so chönnt-me's jo ebe zletscht-em-End emool gad ase goh loo, aber ebe, met em Trampel sinere himmellääde vetläädige Frisur ischt ebe ase-n-halt ase glych nüd gmacht…» Trampel: «Looset ehr, Hilaari Baabe, er lönd alls ase schlaampe, womm-me denn ebe-n-ase gliich au bim Züüg see sött ond luege, ond d'Schittli zelle ond d's Geldli spaalte ond huuse jo ebe –huuse-huuse-hüüsele – aber i meene, wenn enn huufe Chöschte hender em andere vörechond, so sääd me dem nüd huuse, aber henderhuuse.» Hilaari Baabe: «Jo ond-zletscht-em End will niemet Stüüre ond bschyssid denn ebe de Staat oder ebe s'Land ond luegids denn no för e bsonderegi Ehr aa, wenn's no recht viil Noostüüre geed ond me denn sägi: ebe, dere Lüüt söttme-n-en Bläätsch haa bi öös.» Trampel: «Jää, die seb Rechnig schlood eu denn no gaanz anderscht off de Mage ond i d'Bää, graad wie's Hürothe ond s'Betroge werde...» Hilaari Baabe : «Du Blooterechopf ! Jetz hönd ehr sibe rothi, bauelegi Fazaneezli ond drei Totzet hölzig Luussträhl ond föfesechzg isegi Schuelöffel ond vier Totzet nossbömmegi Stefelhönd ond zwää Totzet zwetschgebömmegi Chriesihööge ond föfesibezg Paar gspättleti PöntnerStrömpf sammt silbrege Schuering ond semilöörege Strompf ond Bruchbänd ond s'Mesmer Milchgeld bruucht för de Wahlkampf, ond eues Wiib macht all no eh Gattig wie e vehungereti Vogelschüüchi im Buechberg onne du Trampel, mer wössid jo, wie-n-er alls zsämmefresset ond abewoorget, bis zletscht bringet ehr öös allsam, no met euere himmellääde vetläädelige Frisur, i s'Narrehuus!»

Quelle: Alfred Toblers Narregmend.