Melchior Lusti-Schafflützel (1933–2016)

Dä Melch, üsä Dädi, isch am 31. Dezember 1933 i dä Hagisegg/ Lutäwil uf d Welt cho. Mit sinä föf Gschwöschtertä hät er ä schöni Chindheit dörfä erläbä. Scho währed dä Schuelzit isch er uf äm Stockberg gsi. Noch sinerä Konfirmation hät dä Melch acht Alpsommer uf äm Stockberg verbrocht.

Im 1962 hät er ä Pacht im Bleikä z Wattwil öberno und zwei Johr spöter d Elsi Schafflützel ghürotä. Innerhalb vo nün Johr sind inä vier Chind gschänkt wordä. Trotz dä viellnä Arbet hät er sich immer weder Zit gno för sini Frau und d Chind. Ä grossi Tradition i dä Familiä isch s Brämi z Wattwil gsi. Au wo dä Dädi ufghört hät burä, isch er im halbä Toggeburg a dä Vächschau a z treffä gsi. Ä grossi Freud isch sis erschti Grosschind im 1983 gsi. Bald hät er sich öber vier witeri Grosschind dörfä freuä. 1990 hät dä Melch mit sinerä Familiä dä Burähof z Wattwil müessä verloh und isch denn uf Ebnat-Kappel zöglät. Vo det us hät er im Scheftenau no zwei Johr witer burät, bis d Schmerzä i sinä Hüft so gross wordä sind, dass er mit schwärem Herzä sini Pacht hät müessä ufgä. Vo sinä zwei Hüftoperationä hät er sich recht schnell erholt. Ganz ä schwäri Zit isch för dä Melch gsi, wo er innerhalb vo drü Johr sini Gschwöschterti Vreni, Köbi und Rösli verlorä hät.

Sin gröschtä Wunsch isch äs immer gsi, weder emol chönä z Alp go. Zä Alpsommer hät dä Dädi dörfä im Hinterschlatt verbringä. Äs isch ä schträngi Alp gsi und er hät mit dä Lütisalp öppis ringers gfundä. Sini gröscht Freud isch äs gsi, wenn d Grosschind bi ihm i dä Feriä blibä sind. I dä Lütisalp hät dä Dädi bis vor ämä Johr chönä z Alp si. Leider isch das sin letschtä Alpsommer gsi. Chum isch er im Herbscht 2015 dihei gsi, hät sich sini Gsundheit verschlechteret. Noch villnä Wochä Spitolufenthalt hät er churz vor dä Wiehnacht hei dörfä. Mit Hilf vo sinerä Frau Elsi, dä Familie und Nochburä hät dä Dädi bis fascht äm Schluss chönä dihei si. Ä Wochä vor sim Tod hät er nomol dörfä i d Hagisegg zu sinä Brüederä und uf sini gliebti Lütisalp. Noch sechs Täg im Spitol hät ihn d Chraft und dä Willä verloh und üsä Dädi isch am Sunntig, 28. August, im Kreis vo sinerä Familiä för immer igschlofä.

Dä Melch, üsä Dädi isch än härzensguetä Mensch gsi. Mit sinerä ufgschtelltä Art und sinä Spröch hät er för mängä luschtigä Moment gsorget. Sini Läbesfreud, sini Naturverbundäheit und sis Lachä händ ihn för üs so bsunders gmacht. Dini Familiä.